Fotballnomadar frå Follese

Kontrasten mellom opphaldet i Hjørring og Oslo er slåande for den store Follese-kontingenten. Dana Cup: Flott skule, mange kampar og dårlege resultat. Norway Cup: Sliten skule, få kampar og berre sigrar.

– I Danmark spelte vi med 11 spelarar. Denne veka opererar vi med eit sjuarlag, fortel Mia Skeie, før ho forklarar litt nærare:

– Vi reiste 19 jenter med Fjordline til Danmark. Sju av dei har av ulike årsaker reist heimatt. Mange skulle på ferie med familien til Syden. Dei kunne nok like godt vore heime. Iallfall om det er sol og varme dei jaktar på.

Mykje uflaks
Jentene til Follese var i Hjørring på Dana Cup i fjor også. Då vart Kristiane Hetlevik alvorleg skada i foten. Denne gongen gjekk det akkurat like galt.

– Ganske utruleg, men etter to turneringar på dansk jord, har Kristiane berre fått spelt halvannan kamp. Ho er mellom dei sju som alt har reist heim til Askøy. På krykker, sukkar follesejentene.

Og ho var heller ikkje den einaste i gjengen som hadde uflaks i Danmark. Trond Johannessen fekk totalt motorhavari, og det var ingen veg utanom eit verkstadopphald som kosta flesk. Men no går bilen att.

Prinsesseparty
Då var det langt kjekkare for tvillingparet Caroline og Camilla Dahle Lie. Dei dyktige fotballspelarane fylte 15 år under Dana Cup, og resten av laget stelte i stand ein skikkeleg prinsessebursdag.

– Vi fekk både mjuke elefantar og nye truser, smiler jentene.

I Danmark var som sagt kampprogrammet tett. Utan at Follese fekk den store utteljinga.

– Ingen kommentar, er svaret når vi lurer på korleis det gjekk. Men så kjem det litt etter litt.

– Vi var plaga med mykje gnagsår og sveitte bein, men kom til kvartfinalen i B-sluttspelet. I Norway Cup derimot har vi allereie vunne dei to første kampane i gruppa, og er klare for A-sluttspelet. No kan alt skje, meiner målvakt Tone Hopstad, som i skrivande stund har halde nullen i verdas største fotballturnering.

Stor overgang
Då Follese kom frå Danmark, tok dei ein stor taxi opp til skulen dei skulle bu på.

– Du kan trygt skriva at den levde opp til namnet sitt: Gamle Løren skole. Det var omtrent som å hamne i slummen, samanlikna med luksusskulen i Danmark. Det er muggsopp på veggene og i dusjen kryr det med kakerlakkar. Så er skulen også lagt ned for nokre år sidan, og blir berre brukt denne eine veka i året, stønnar jentene. Men må likevel medgje at på trass av elendige butilhøve, så er det fantastisk moro å vera deltakarar under Norway Cup.