Tapte mot storebror i Oslo

– Rikshospitalet er store. Vi skjøna at det ville gå den vegen. Det er ikkje lett å kjempe mot storebror, seier økonomisjef Guri Berg Titlestad på Olaviken alderspsykiatriske sjukehus.

Eit brev frå helsedepartementet til direktoratet tyder på at Olaviken tapar kampen om statusheving til kompetansesenter.

I staden får dei tittelen undervisningssjukeheim, og må samarbeide med storebroren i Oslo.

På Rikshospitalet har dei allereie eit senter for sjeldne sjukdomar. Kompetanseansvaret for sjukdomen Huntington skal ikkje flyttast slik sterke politiske krefter har tatt til ordet for. Forskarane vert med andre ord i Oslo, men tittelen undervisningssjukeheim ber bod om fleire ressursar også på Askøy.

Frode Wikne er ny direktør ved Olaviken. Han reknar med ei utvida stab om ikkje lenge, og forsikrar at dei verken er såra eller vonbrotne etter tapet på målstreken.

Planar for 130 mill
Det viktigaste for direktøren og økonomisjefen på Olaviken har vore å få ei avklaring.

Dei sit på gjerdet med ut- og ombyggingsplanar til omlag 130 millionar kroner.

I løpet av dei neste vekene ventar samtalar med ei rekkje partar: Helse Vest, Bergen kommune og Askøy kommune. I tillegg må dei vite heilt sikkert kva som skjer med kompetansesenteret.

Askøyværing og Krf-politikar Laila Dåvøy såg kva veg det bar då ho snakka med Askøyværingen for eit par veker sidan. Ho sa mellom anna at det var meiningslaust å velje Rikshospitalet framfor Olaviken.

– Eg veit at det har vore motstand på Rikshospitalet, men der har dei kompetansen – ikkje pasientgruppen, rasa Dåvøy.

Dåvøy er medlem i helse- og omsorgskomiteen. Det same er Dag Ole Teigen (Ap). Også han har arbeidd intenst for å styrkje Olaviken.

Slaktar framdrifta
– Eg har følgt denne saka sidan eg hamna på stortinget for fire år sidan, og er fortvila over at det ikkje har vore meir framdrift, seier Teigen til Askøyværingen.

Han poengterer at det særleg er behov for to ting når det gjeld sjukdomen Huntington:

– Vi treng meir kunnskap om det som går direkte på pasientbehandling. Samstundes treng vi meir forsking og kompetanse på det som går på sjølve sjukdomen som fag, seier han.

Han er opprørt, men respekterer likevel avgjerda om å ikkje gjere Olaviken til eit kompetansesenter.

– Ei arbeidsgruppe rår til at forskarane skal vere på Rikshospitalet. Det er vanskeleg for meg som politikar å gripe inn i ei slik vurdering, seier Teigen og legg til:

– Undervisningssjukeheim er også ein viktig status. Det viktigaste er i alle tilfelle at Olaviken vert styrka og får ressursar til å spreie kompetansen sin utover.

– Dåvøy er frå Askøy, kvifor har du engasjert deg så sterkt for Olaviken?

– Dei store sjukdomsgruppene vil vi alltid ha langt framme i pannebrasken, men så er det langt sjeldnare sjukdomar som også har trong for forsking, seier Teigen.