Slepp bot for gigantmuren

– Denne muren ville kome inn under dei nye reglane. Men eg veit ikkje i kva grad, seier fagsjef for arealbruk Knut Natlandsmyr.

Fredag skreiv AV at gigantmuren på Øvre Kleppe, som mange naboar har klaga på, får stå. Men i sakspapira står det òg i generelle vendingar om at ein i større grad enn før kan risikera gebyr dersom ein byggjer noko utan løyve.
Dei som har bygd den ulovlege muren kan førebels pusta letta ut.

– Ein får ikkje gebyr i dette tilfellet, fordi muren vart bygd før dei nye reglane vart sette i verk 1.juli i år, seier Natlandsmyr.
Han legg til at arealbruksavdelinga likevel ser på andre sanksjonar, men at ein ikkje har konkludert.

– Noko av det ein kan gjera, er at ein kan vurdera ansvarsretten. Det betyr at dersom same søkjar ber om å få setja i gang med eit nytt tiltak, kan me seia nei til dette, seier Natlandsmyr.
Kommunen kan òg rapportera inn til Statens byggtekniske sentral, slik at ei eventuell sentral godkjenning står i fare. Begge desse sanksjonsmåtane gjeld berre profesjonelle utbyggjarar.

Kor store gebyra for ulovleg bygging vert, er enno ikkje bestemt. Utval for teknikk og miljø kjem til å få ei sak om dette så snart som mogleg, seier Natlandsmyr.
– Tanken er at satsane skal svi litt, seier fagsjefen.

I Forskrift om byggesak opererer ein med tre satsar: 10.000 kroner dersom tiltaket i hovudsak stemmer med krava i plan- og bygningslova, 50.000 dersom tiltak i hovudsak ikkje stemmer med lova sine krav og 200.000 kroner dersom tiltaket medfører alvorleg skade som ikkje kan rettast opp – eller fare for slik skade. Natlandsmyr understrekar at det er fullt mogleg å få gebyr for eit tiltak som ein får godkjent.

– Kva tiltak ein kan få gebyr for, vil me diskutera i saka politikarane får, seier han.
Også Tom-Christer Nilsen (H), som leiar utval for teknikk og miljø, meiner muren på Øvre Kleppe hadde kome inn under reglane for gebyr dersom han hadde vore sett opp etter 1.juli.

– Poenget med den nye gebyrordninga er at ho skal ha ein faktisk preventiv verknad. Det skal svi å gjera noko ulovleg, og det skal ikkje vera lettare å verta tilgitt enn å få lov, seier Nilsen.

Han seier at for å bestemma gebyrsatsane vil politikarane samanlikna med andre bøtesatsar. Gebyret for ulovleg bygging går til kommunen. Ifølgje Nilsen gjer pengane at det er lettare å finansiera bygningskontroll.