Nokon har laga ein bossplass

– Dette er dessverre ikkje ei ukjent problemstilling, seier kommunen sin miljøvernleiar, Målfrid Eide.

– Ofte har tømming av boss ein smitteeffekt. Det er synd for alle dei som ryddar etter seg, seier ho.

Skremde vekk mann
Torsdag var AV på Steinrusten. Der har nokon sett frå seg ein gamal bil. Bilen er rusta, utan skilt og med knust rute. I tillegg står det to fjernsyn der, eit stort spann med solsikkeolje, ein bosspose ligg i grøfta og nokon har lagt frå seg ein heil hekk.

– Det er ingen som gjer noko med dette, og fleire og fleire som tek seg til rette. Me har ein BIR-stasjon, det kostar femti kroner å levera bosset der, seier Arve Antonsen oppgitt.

Han går ofte tur i området med hunden. Førre veke trefte han ein mann som tydelegvis hadde planar om å kasta frå seg boss på staden.

– Eg stirra så lenge på han at han kjørte sin veg, seier Antonsen.

Han har vore i kontakt med både politiet og kommunen om den gamle bilen.

Bilen vert skrota
Politiførstebetjent Kjell-Bjørn Heggøy seier at politiet førre veke sendte ei liste til kommunen med bilvrak som kommunen kan fjerna.

– Dersom publikum ser bilvrak, må dei ta kontakt med kommunen sitt kundetorg og fylla ut eit skjema. Dette skjemaet vert så sendt til oss, og så prøver me å finna eigaren, seier Heggøy.

Dersom ein ikkje finn eigaren, eller dersom eigaren ikkje fjernar bilen sjølv, kan bilen fjernast utan varsel.

– Me har ein avtale med kommunen om at dei hentar dei bilane dei får med seg. Desse bilane vert kjørt rett på dynga, seier Heggøy.

Men kven som skal ta seg av resten av bosset, er meir usikkert.

– Me må reisa ut og sjå på det. Men kommunen har ikkje budsjett til bosshandtering – og dersom me skal levera på miljøstasjonen, må me som alle andre betala, seier Målfrid Eide.

Lova seier at det er den som forsøplar som skal betala.

– Men ofte er vedkomane vanskeleg å finna. Me opplever mellom anna at nokon kjører inn på skogsvegar og dumpar boss der, seier Eide.