Konsulent krev ekstrabetalt

Konsulentfirmaet Rambøll trakk det lengste strået då Askøy kommune avgjorde kven som skal leie utbygginga av dei nye skulane på Fauskanger og i Kleppestø.

Rambøll har prosjektleiar og byggeleiar på begge skulane.

– Dette er svært viktige roller. Arbeidet Rambøll gjer må gå på skinner. Det er store summar vi snakkar om her, seier fagsjefen for eigedom i Askøy kommune, Ove Vonheim.

Men arbeidet går ikkje på skinner, ifølgje Rambøl. Allereie før byggestart krev Rambøll 745.000 kroner meir for jobben i nord. Avtalt pris for å leie utbygginga av nye Fauskanger barne- og ungdomsskule, var i underkant av to millionar kroner.

Kan takke seg sjølv
Etter at kontrakten vart inngått har kommunen gjort val som både er meir krevjande og tek lengre tid, meiner Rambøll.

I kravbrevet til kommunen skriv prosjektleiar Lars-Petter Smidt at skulen først vil stå ferdig august 2012 – åtte månader etter planen.

Delar av utsetjinga er Rambøll skuld i sjølv, poengterer Vonheim. Rambøll har ikkje gjort jobben sin til rett tid, noko som ifølgje Vonheim førte til at anboda på resten av jobben kom tre månader seinare ut enn planlagt.

I eit svarbrev til Rambøll avviser fagsjefen dei ekstra honorarkrava – og ber firmaet gjere jobben sin som avtala.

Han peiker mellom på at Rambøll har brukt andre enn Lars Petter Smidt til å leie arbeidet.

– Dette er eit lovleg og slett ikkje uvanleg spel. Den daglege tonen med Rambøll er god. Vi er nøgd med jobben dei gjer, forklarar Vonheim.

– Vi følgjer med
Krav som det Rambøll kjem med, er kvardagskost for Vonheim.

– Vi har vore ryddig i denne saka. På den måten sender vi eit signal til både Rambøll og andre firma som arbeider for kommunen, seier Vonheim.

Om fagsjefen ikkje følgjer innleidde konsulentfirma og entreprenørar med argusauge risikerer, han store ekstrarekningar. Dei har ikkje Askøy kommune råd til.

Rambøll har ikkje svart Askøy kommune på brevet der Vonheim seier kontant nei til honorarhoppet. Prosjektleiar Lars Petter Smidt vil heller ikkje kommentere saka overfor AV.

– Bedrifta vår kommenterer ikkje slike saker i media, seier Smidt og let det vere med det.