Fylkesmannen seier ikkje ja

«Sponheim hadde forståelse for problemstillingen med manglende parkering, og meddelte at ha ville stille seg positiv til parkeringsplass i området».
Det står det i sakspapira til formannskapsmøtet som skal vera på tysdag, og det same stod i sakspapira til utval for teknikk og miljø sitt møte førre veke.

Det handlar om parkeringsplass ved inngangen til valen på Herdla. Tysdag skreiv AV at SV-representant Jørgen Garmann og Frp-representant Anton Fromreide er svært usamde i vedtaktet om å løyva 100.000 til reguleringsplan.
Men fylkesmannen har slett ikkje vore så positiv som det står i sakspapira. Det seier Stein Byrkjeland, rådgjevar ved fylkesmannen si miljøvernavdeling.

– Den andre setningen der stemmer ikkje. Me har sagt at me ikkje automatisk er negative. Ofte får ein inntrykk av at fylkesmannen kjem til å seia nei uansett, men det er ikkje slik me jobbar. Me vil ta stilling til reguleringsplanen når me får han, seier Byrkjeland.
Rådgivaren seier òg at representantar frå fylkesmannen slett ikkje var på Herdla berre for å sjå på ein parkeringsplass. Saman med Sponheim og assisterande fylkesmann Rune Fjeld var det Byrkjeland som var på Herdla.

– Me har levert forvaltningsplanen for Herdla til fagleg godkjenning hos Direktorat for naturforvaltning. Sidan Sponheim er fersk i jobben som fylkesmann, tok me ein tur slik at han skulle få sjå området, og me var både på museet og på gjestehuset. I tillegg trefte me eigaren av Herdla gard, og då vart parkeringsplassen eit tema, seier Byrkjeland.

Rådgjevaren seier at han personleg er kritisk til å flytta ein parkeringsplass så nær fuglane, men at han ser problemstillinga med parkeringsplass på Herdla. Han seier òg det same som dei to lokalpolitikarane: ein heilskapleg plan for Herdla hadde vore å føretrekkja. Kommunedelplanen er enno ikkje ferdig, og må ifølgje fagsjek Knut Natlandsmyr sjåast i samanheng med kommunen sin nye arelaplan, som enno ikkje er vedteken.

– Eg reknar med at me får kommunedelplanen når han kjem på høyring. Og me har ein grei kontakt med kommunen, understrekar Byrkjeland.
Fagsjef Ivar Ådlandsvik seier at ingen frå kommunen var med på synfaring saman med fylkesmannen.

– Me synest det er rart at kommunen ikkje var varsla om dette. Men det er altså ordlyden me ikkje er samde om. Eg har fått meddelt frå eigaren av Herdla gard kva som vart sagt, seier Ådlandsvik.

Han seier at saka uansett handla om å få løyvd pengar til planlegging av parkeringsplassen. Sidan det er i offentleg interesse å få laga ein parkeringsplass, meiner fagsjefen at det er naturleg at kommunen betalar for reguleringsplanen.
– Må kommunen òg betala for grunn til parkeringsplassen?
– Det har me ikkje diskutert enno, så det er ikkje noko eg vil ta stilling til no, seier Ådlandsvik.