Får byggja ballbinge

Det har lange vore planar om å rusta opp nærmiljøanlegget på Svebrotet. Velforeininga i området har søkt om å få byggja ballbinge, sykkel/rollerskate-bane og klatrevegg, men nokre av naboane har klaga. Dei meiner anlegget vil generera støy, og at eit slikt anlegg vil vert samlingsplass for ungdom på kveldstid.

Vil legga til rette for leik
Naboane vil i staden at anlegget vert tilpassa til dei yngste barna, med moglegheit for ballspel, leikeapparat og leik med modellbilar og barnesyklar. Det skriv dei i eit brev til kommunen.

Saka har allereie vore fleire gonger i det politiske systemet, og òg til handsaming hos Fylkesmannen i Hordaland. Denne veka vedtok eit einstemmig utval for teknikk og miljø at velforeininga får byggja ballbingen og det andre dei har søkt om.

– Denne saka handlar om skjønn. På den eine sida har ein naboane sin rett til fred og ro, på den andre sida har ein barn sin rett til leik. Å leggja til rette for fysisk leik er noko det er stor semje om, òg på nasjonale plan, seier utvalsleiar Tom-Christer Nilsen (H).

Kan verta støy
Det er utført støymålingar som viser at nokre av naboane truleg kan oppleva eit støynivå som er høgare enn 60 desibel. Dette er talet Helsedirektoratet sin rettleiar opererer med, men det er ikkje eit krav.

– Me har sett som krav at det skal setjast opp eit nett, slik at ballen ikkje smell i veggen, og det skal òg setjast opp skjermingsveggar, seier Nilsen.

Han meiner at støy frå leikande og ballspelande barn er noko ein må rekna med i eit bustadområde.

– Eg synest det er vanskeleg å argumentera med at ballspark er høg lyd, seier han.

Det har ikkje lukkast AV å få tak i talsperson for verken naboane eller velforeininga.