Vil gjere Askøy til musikaløy

Marianne Juvik Sæbø og Ann-Sofie Jonsson arbeider med kvar sine område i kulturskulen. Juvik Sæbø underviser i song, Jonsson i dans. No har dei funne ein felles plattform.

Måndag i neste veke inviterer dei lokal ungdom til eit nytt tilbod: eit musikalkurs. Stuntet er eit prøveprosjekt for å lodde musikalstemninga på øya.

Målet er å etablere eit fast tilbod til unge musikaltalent og skape eit miljø som kan bere ei storoppsetting i året.

Skal i elden på torsdag
– Vi har lyst til å etablere noko heilt nytt, eit reindyrka musikalopplegg, seier Juvik Sæbø.

Musikalkurset startar måndag 9. august og har trass beskjeden marknadsføring lokka til seg 12 ungdomar i alderen 10 til 15 år.

Alle skal få undervisning i både dans og song. Juvik Sæbø kjenner berre nokre av namna på lista si, og er difor svært spent på nivået og kva dei kan få til på fire dagar.

– Undervisning måndag, tysdag, onsdag og torsdag skal munne ut i ei førestilling torsdag kveld, seier Juvik Sæbø.

Publikum vil mellom anna få smakebitar frå dei kjende musikalane «Mamma Mia!» og  «High School Musical». Det vert óg nummer som «There´s no business like show business» og «Tomorrow».

Må meistre begge delar
Juvik Sæbø sakna eit liknande tilbod då ho sjølv vaks opp på Askøy.

Saknet vart tydeleg då ho studerte song i London og freista lukka på audition.

– Då eg prøvesong tenkte eg: «Å! Tenk om eg hadde hatt erfaring med dette,» hugsar Juvik Sæbø.

Det er nettopp dette ho ønskjer å gje ungdomen på Askøy; draghjelp til å hevde seg. Det nyttar ikkje berre å ha ei god songstemme. Nøkkelen til suksess i musikalverda er å meistre begge delar: både song og dans.

– Eg veit at det er mange talent på Askøy, seier Juvik Sæbø og legg til:

– Det vert jamleg sett opp musikalar på for eksempel Den Nationale Scene i Bergen. Det hadde vore gøy å gje ein lokal gjeng den nødvendige grunnopplæringa til å kunne hevde seg mellom anna der, seier Juvik Sæbø, som håpar gjengen vert stor nok til også å kunne gje noko attende til Askøy.

Todelt motivasjon
– Vona er at dette kan vere ei spire til å få musikklivet på Askøy til å blomstre enno meir, seier Juvik Sæbø.

Det nye musikalparet Juvik Sæbø og Jonsson ser for seg at ei årleg storoppsetting kan verke samlande.

– Det involverer mange ulike delar av musikkmiljøet: alt frå strykarar, blåsarar, solistar, kor, dansarar og folk som driv med lyd, lys og koreografi, seier Juvik Sæbø.

Motivasjonen bak prosjektet er todelt: På den eine sida ønskjer dei å skape noko som kan vere del av levebrøda deira, men dei har også ei ideell målsetting.

– Vi vil vekke den stolte bygdekjensla. Tenk så kult det hadde vore om folk kom frå «bydn» til Askøy for å sjå musikal, seier Juvik Sæbø.