Ny konfirmant-rekord

Det er søndag ettermiddag. I Strusshamn kyrkje sit nærare 300 konfirmantar som tente lys. I dag er det Road Service, ei ungdomsgruppe frå Agder bispedøme, som har undervisning. Aldri tidlegare har så mange askøykonfirmantar vore samla.

Trur på folkeveksten
Til hausten er det nemleg 301 14- og 15-åringar som skal konfirmerast i dei fem kyrkjene på øya. Det er kateket Ståle Olsen godt nøgd med.

– Me har ikkje hatt over 300 konfirmantar før. Eg trur ikkje det er berre ei årsak til at det er slik, og folkevekst har nok ein del å seia. Men me ser at ein stor del av dei som er døypte vel å konfirmera seg i kyrkja. Det synest eg er flott, seier Olsen.

Han fortel at det var 307 små askøyværingar som vart døypte i 1995. No er same årskullet konfirmantar.

– Konfirmasjonen er jo ei stadfesting av dåpen, og å konfirmera seg er ein tradisjon som stikk djupt. Men eg trur òg nokre er nyfikne på det med kristentru. Andre vel nok å konfirmera seg fordi tidlegare konfirmantar har skrytt av opplegget, trur Olsen.

Fokus på klima
Noko av konfirmantopplæringa er felles for alle askøykonfirmantane, andre deler skjer i dei ulike kyrkjene. Tema dei skal innom er å verta kjende med Bibelen, læra om gustenesta og kyrkja og snakka om kven Jesus var. Og kva er dette med treeinig Gud?

– Det er kanskje ikkje så lett å forstå, smiler Olsen.

Men konfirmantane lærer òg om meir kvardagslege tema. Årets fasteaksjon, som konfirmantane skal vera med på, går til Kirkens nødhjelp sitt arbeid etter naturkatastrofar.

– Naturkatastrofar heng saman med klimaendringar, og det er me i dei vestlege landa som har høge utslepp. Difor meiner me at me må gi noko attende, mellom anna flaumsikre hus, seier Olsen.

– Dessutan meiner me at menneske har fått eit forvaltaransvar frå Gud. Klimaendringane er eit viktig tema, slær han fast.

– Stas i kyrkja
Ein del av konfirmantundervisninga er å reisa på leir. Det gler Vendela Rikstad seg til. Til sommaren skal ho og mange andre askøykonfirmantar på leir på Kongshaug utanfor Os.

– Då trur eg eg vert kjend med nye folk, seier ho.

Vendela ønskjer å finna ut meir om kva kristendom eigentleg dreiar seg om. Det vil Michelle Soltvedt òg.

– Eg håpar eg får vita meir om Jesus, seier ho.

Dei to jentene, som skal vera konfirmantar i Herdla kyrkje i september, seier at dei fleste ungdommane dei kjenner vel kyrkjeleg konfirmasjon.

– Eg gler meg mest til sjølve konfirmasjonsdagen. Eg trur det vert stas å vera i kyrkja, seier Michelle.

– Kor mykje betyr gåver og selskap?

– Det betyr mykje det òg, det er sjølvsagt stas med bunad, selskap og god mat, og med pengar og smykke, seier ho.