Kommunen – offentleg hushai?

Husbanken sine ordningar tek utgangspunkt i at det er billegare å leiga på Askøy enn i Bergen. Når det ikkje er tilfelle lenger, kjem askøyværingane skeivt ut. Folk som kan nyte godt av den statlege husbanken sine ordningar i Bergen, får på Askøy beskjed om at dei tener for mykje til å få hjelp. Slikt er urimeleg og må ordnast opp i. Det er overraskande at Husbanken legg opp til ei differensiert ordning basert på husleigeprisane, utan å halde seg oppdatert på utviklinga i dei same prisane.  Vi forventar at Husbanken høyrer på Askøy kommune når dei no tek kontakt, og at dette vert endra snøggast råd.

Samstundes bør kommunen sjå litt på korleis dei sjølv driv bustadutleige. Sidan sosialtenesta er kommunal, og pengane kjem frå kommunen, ville det for kommunen sitt totalbudsjett bli hipp som happ om dei menneska det gjeld fekk lågare husleige eller sosialhjelp. Slik det er no, sender ein privatpersonar frå kommunen som huseigar for å be om pengar frå kommunen som sosialhjelpar. Ein overfører pengar frå sosialbudsjettet til eigedomsavdelinga – og tvinger folk som er i ein allereie vanskeleg situasjon ut i ein lite hyggeleg runddans med sosialtenesta.

Samstundes bør ein stille spørsmål ved kommunen sin husleigefastsetjing. Er det rett av kommunen å liggje så høgt med husleiga som ein gjer? Kva er formålet med ei kommunal utleigeteneste? Burde ikkje kommunen la dei private stå for pressinga av utleigeprisane, mens kommunen prøvde å halde ein meir sosial profil? Det er sjeldan folk med god økonomi og velordna liv som treng kommunale bustader. Då hadde det ikkje gjort noko om kommunen la opp til at utleige vart eit litt mindre problem i kvardagen.

Diverre har ikkje den kommunale eigedomsforvaltning vore heilt patent på alle områder. Vedlikehaldsetterslepet er stort, og kommunen har ikkje klart å skaffe seg alle dei husværa ein ynskjer. I fjor haust tok ein tak for å betre kontrollen med boligforetaket. Vi forventar at ein og tek grep for å betre heile utleigesituasjonen. Kommunen skal ikkje vere ein bustadhai.